Maxfiylik siyosati

Ushbu Maxfiylik siyosati MilliyBot (keyingi o'rinlarda — «biz») tomonidan MilliyBot platformasi doirasida shaxsga doir ma'lumotlarga ishlov berish tartibini belgilaydi. Platformaga quyidagilar kiradi:

• milliybot.uz sayti va sotuvchilar uchun veb-panel;
• sotuvchilar uchun mobil ilova;
• MilliyBot platforma boti va sotuvchilarning Telegram botlari orqali ishlaydigan do'konlar (Telegram Mini App vitrinasi va veb-vitrina).

Siyosat O'zbekiston Respublikasining 2019-yil 2-iyuldagi O'RQ-547-son «Shaxsga doir ma'lumotlar to'g'risida»gi Qonuni va boshqa qonun hujjatlariga muvofiq tuzilgan.

Platformadan foydalanish yoki ro'yxatdan o'tish orqali siz ushbu Siyosat bilan tanishganingizni tasdiqlaysiz. Platformadan foydalanish qoidalari alohida hujjatda — Foydalanish shartlarida belgilangan.

Platformada ikki xil foydalanuvchi bor, va biz ularning ma'lumotlariga turli rolda ishlov beramiz:

• Sotuvchilar va ularning xodimlari (panel hisoblari). Bu ma'lumotlarning operatori — biz. Ularni qanday va nima uchun ishlatishni o'zimiz belgilaymiz va shu Siyosat bo'yicha javob beramiz.
• Xaridorlar — sotuvchi do'konidan Telegram yoki veb-vitrina orqali xarid qiladigan shaxslar. Bu ma'lumotlarning egasi va operatori — tegishli do'kon (sotuvchi). Biz ularga faqat sotuvchi nomidan, uning topshirig'i bilan va xizmatni ko'rsatish uchun zarur hajmda ishlov beramiz.

Agar siz xaridor bo'lsangiz, ma'lumotlaringiz bo'yicha birinchi navbatda do'konning o'ziga murojaat qiling: buyurtma, yetkazib berish va to'lov shartlarini aynan sotuvchi belgilaydi. Sotuvchi o'z xaridorlari oldida ma'lumotlarga qonuniy ishlov berish, jumladan zarur rozilikni olish uchun javobgar. Biz sotuvchiga bu so'rovni bajarishda yordam beramiz.

Sotuvchi va xodim hisobi

• email, ism va familiya, foydalanuvchi nomi, profil rasmi (agar yuklasangiz), interfeys tili;
• parol — faqat qaytarib bo'lmaydigan xesh ko'rinishida, parolning o'zi saqlanmaydi;
• emailni tasdiqlash vaqti, hisob roli va do'kondagi xodim roli, sizni kim taklif qilgani.

Do'kon ma'lumotlari

• do'kon nomi va manzili (slug), logotip va brend sozlamalari, statik sahifalar;
• Telegram bot tokeni, bot identifikatori va nomi, do'kon egasining Telegram ID raqami;
• mahsulotlar, toifalar, narxlar, qoldiqlar, yetkazib berish hududlari, aksiya va sovg'a kartalari;
• Payme va Click to'lov tizimlari kalitlari, Telegram to'lov provayderi tokeni, integratsiya sozlamalari (API kalitlari, webhook manzillari).
• karta o'tkazmasi yoqilganda: xaridorlarga ko'rsatiladigan karta raqami va karta egasining ismi;

Kirish seanslari va qurilmalar

• IP-manzil (kirishdagi va oxirgi), brauzer va operatsion tizim, qurilma turi va modeli, to'liq User-Agent qatori;
• IP-manzil bo'yicha aniqlangan mamlakat va shahar, kirish usuli (parol yoki Google), seans boshlangan, oxirgi faol bo'lgan va tugagan vaqt;
• mobil ilovada push-bildirishnomalar yoqilganda: qurilma tokeni, platforma (Android/iOS), ilova versiyasi va tili.

To'lov va yordam

• tarif, obuna muddatlari, siz yuklagan to'lov cheki rasmi va summasi, administrator izohi;
• yordam xizmatiga yozgan murojaatlaringiz va yozishmalar;
• sun'iy intellekt funksiyalari uchun o'zingiz kiritgan API kalit.

Xaridor ma'lumotlari (sotuvchi nomidan)

• Telegram ID, foydalanuvchi nomi, ism va familiya, Telegram tili; veb-vitrinada Telegram orqali kirilganda — profil rasmi havolasi;
• telefon raqami, yetkazib berish manzillari va xaritada belgilangan koordinatalar;
• buyurtmalar: tarkibi, summasi, to'lov usuli, izoh, holatlar tarixi; to'lov cheki skrinshotlari; qaytarish so'rovlari va ularga ilova qilingan rasmlar;
• sharhlar, sevimlilar, savat, bonus ballari, sovg'a kartalari; sotuvchi qo'shgan izoh va teglar;
• do'kon boti orqali yuborilgan xabarlar va ommaviy xabarnomalar;
• vitrinadagi harakatlar: do'kon va mahsulot ko'rilishi, savatga qo'shish, buyurtmani boshlash va yaratish. Ular tasodifiy seans identifikatori va Telegram ID bilan bog'lanadi va sotuvchi uchun kunlik statistikaga jamlanadi.

Nimani yig'maymiz

Xaridorlarning bank kartasi raqami va CVV kodi platformaga kiritilmaydi: onlayn to'lov Payme, Click yoki Telegram sahifasida amalga oshiriladi, biz faqat to'lov holatini olamiz. Biz maxsus toifadagi ma'lumotlarni (sog'liq, diniy yoki siyosiy qarashlar, biometrik ma'lumotlar) so'ramaymiz.

• hisob yaratish, kirish va do'konni ishga tushirish, botni ulash;
• buyurtmalarni qabul qilish, sotuvchi va xaridorga bildirishnoma yuborish, to'lovni tasdiqlash, fiskal chek uchun ma'lumotni to'lov tizimiga uzatish;
• xavfsizlik: faol seanslar ro'yxatini ko'rsatish, shubhali kirishni aniqlash, suiiste'mollarning oldini olish;
• obuna va tarif limitlarini hisobga olish, to'lov cheklarini tekshirish;
• sotuvchiga analitika va hisobotlar tayyorlash;
• xizmat xatlari: emailni tasdiqlash, parolni tiklash, xodimni taklif qilish. Reklama xatlarini yubormaymiz;
• yordam so'rovlariga javob berish, platformani barqaror ishlatish va yaxshilash;
• qonun talablarini bajarish va huquqlarimizni himoya qilish.

Biz shaxsga doir ma'lumotlarga quyidagi asoslarda ishlov beramiz:

• Rozilik. Ro'yxatdan o'tish yoki Google orqali kirishda siz ushbu Siyosatga rozilik berasiz. Xaridorlar rozilikni do'kondan foydalanishda sotuvchiga beradi.
• Shartnomani bajarish. Foydalanish shartlari bo'yicha xizmat ko'rsatish uchun zarur ma'lumotlar.
• Qonun talablari. Soliq, buxgalteriya va vakolatli organlarning qonuniy so'rovlari.
• Xavfsizlik va huquqlarni himoya qilish. Seans jurnallari, suiiste'molning oldini olish.

Rozilikni istalgan vaqtda qaytarib olishingiz mumkin (qarang: «Sizning huquqlaringiz» bo'limi). Bu holda xizmatni ko'rsatish uchun zarur ma'lumotlarsiz hisobdan foydalanish imkoni bo'lmasligi mumkin.

«Google orqali davom etish» tugmasini bossangiz, biz Google'dan faqat openid, email va profile ruxsatlarini so'raymiz. Google bizga email manzilingiz, uning tasdiqlanganligi, ismingiz va familiyangiz hamda profil rasmi havolasini beradi.

• Email, ism va familiyani hisobingizni yaratish, unga kirish va panelda ismingizni ko'rsatish uchun saqlaymiz.
• Profil rasmi havolasini va Google hisob identifikatorini saqlamaymiz.
• Google'dan olingan ma'lumotlarni sotmaymiz, reklama uchun ishlatmaymiz va sun'iy intellekt modellarini o'qitishga bermaymiz.
• Ularni uchinchi shaxslarga faqat xizmatni ko'rsatish uchun zarur bo'lganda yoki qonun talab qilganda uzatamiz. Xodimlarimiz ularni faqat sizning roziligingiz bilan, xavfsizlik maqsadida yoki qonun talabi bilan ko'radi.

MilliyBot'ning Google API'laridan olingan ma'lumotlardan foydalanishi va ularni boshqa ilovalarga uzatishi Google API Services User Data Policy (https://developers.google.com/terms/api-services-user-data-policy) talablariga, jumladan Limited Use talablariga mos keladi.

Google hisobingizga berilgan ruxsatni istalgan vaqtda https://myaccount.google.com/permissions sahifasida bekor qilishingiz mumkin.

Biz reklama yoki uchinchi tomon analitika cookie'larini ishlatmaymiz. Faqat xizmat ishlashi uchun zarur fayllar qo'llanadi:

• dk_access va dk_refresh — panelga kirish seansi. HttpOnly (JavaScript o'qiy olmaydi), Secure va SameSite=Lax; muddati mos ravishda 30 daqiqa va 7 kun.
• NEXT_LOCALE — saytda tanlangan til, brauzer yopilguncha saqlanadi.
• mb_web_session (HttpOnly, 30 kun) va miniapp_lang (1 yil) — veb-vitrinada xaridor seansi va tanlangan til.
• Brauzer xotirasi (localStorage/sessionStorage): savat, til, mavzu (yorug'/qorong'i), panel yon menyusining holati, vitrina statistikasi uchun tasodifiy seans identifikatori va promokod.

Google orqali kirishdan foydalansangiz, Google o'z domenlarida o'z cookie'larini o'rnatishi mumkin; ular Google maxfiylik siyosatiga bo'ysunadi. Cookie'larni brauzer sozlamalarida o'chirishingiz mumkin, lekin unda panelga kirib bo'lmaydi.

Biz ma'lumotlarni sotmaymiz. Ularni faqat quyidagi xizmatlarga, faqat ko'rsatilgan maqsadda va zarur hajmda uzatamiz:

• Telegram — Bot API, Mini App va Telegram Login: xabar yuborish, xaridorni tanib olish, do'konni ochish. Telegram ma'lumotlarga o'z siyosatiga ko'ra ishlov beradi.
• Google — Google orqali kirish (Google Sign-In). Mobil ilovada push-bildirishnomalar yoqilganda — Firebase Cloud Messaging.
• Payme, Click va Telegram Payments — onlayn to'lov. Fiskal chek uchun to'lov tizimiga mahsulot nomlari, MXIK va o'lchov birligi kodlari, narx, QQS va shtrix-kod uzatiladi.
• Email yuborish xizmati (SMTP-provayder) — tasdiqlash, parolni tiklash va taklif xatlari.
• Cloudflare — tarmoq himoyasi va trafikni yetkazish; IP-manzil bo'yicha mamlakat va shaharni aniqlash.
• Anthropic — faqat sotuvchi o'zining API kalitini ulagan bo'lsa (BYOK). Sotuvchi so'raganda mahsulot nomi, toifasi, xususiyatlari, 3 tagacha rasmi va tarjima uchun katalog matni Anthropic'ga yuboriladi. Bunga sotuvchi va Anthropic o'rtasidagi shartlar amal qiladi. Xaridorlarning shaxsga doir ma'lumotlari yuborilmaydi.
• OpenStreetMap (xarita va Nominatim) — xaridor xaritada manzil belgilaganda xarita qatlamlari yuklanadi va koordinata manzilga aylantiriladi.
• Sentry — ishlatilganda, xatolarni kuzatish uchun. Hisobot yuborilishidan oldin undan shaxsga doir ma'lumotlar olib tashlanadi: IP-manzil, email, telefon raqamlari, parol va tokenlar, cookie hamda so'rov tanasi. Foydalanuvchi faqat ichki identifikatori bilan belgilanadi.

Ma'lumotlarni vakolatli davlat organlariga faqat qonunda belgilangan hollarda va tartibda beramiz.

«Shaxsga doir ma'lumotlar to'g'risida»gi Qonunning 27¹-moddasiga ko'ra, O'zbekiston Respublikasi fuqarolarining axborot texnologiyalari, jumladan internet yordamida yig'iladigan va ishlov beriladigan shaxsga doir ma'lumotlari O'zbekiston hududida jismonan joylashgan texnik vositalarda va shaxsga doir ma'lumotlar bazalarining davlat reyestrida ro'yxatdan o'tgan bazalarda saqlanishi kerak. MilliyBot ushbu talabga rioya qilish majburiyatini oladi.

Oldingi bo'limda ko'rsatilgan ba'zi xizmatlar (Telegram, Google, Cloudflare, Anthropic, OpenStreetMap, Sentry) serverlari O'zbekistondan tashqarida joylashgan. Ularga ma'lumotlar faqat tegishli funksiya ishlashi uchun zarur hajmda, qonunda nazarda tutilgan transchegaraviy uzatish shartlariga rioya qilgan holda uzatiladi. Platformadan foydalanib, siz bunday uzatishga rozilik bildirasiz.

• Hisob va do'kon ma'lumotlari — hisob faol bo'lgan davrda. Hisobni o'chirganingizda profilingiz darhol shaxsni aniqlab bo'lmaydigan holga keltiriladi, barcha seanslar va qurilmalar uziladi, boshqa do'konlardagi xodim a'zoliklaringiz olib tashlanadi.
• Kirish seanslari — seans tugagan yoki bekor qilingandan keyin 30 kun o'tib avtomatik o'chiriladi.
• Webhook yetkazish jurnallari — 30 kun.
• Buyurtmaga biriktirilmagan to'lov cheki rasmlari — 24 soatdan keyin o'chiriladi.
• Havolalar: emailni tasdiqlash — 24 soat, parolni tiklash — 1 soat, xodim taklifi — 72 soat amal qiladi.
• Veb-vitrinadagi xaridor seansi — 30 kun.
• Buyurtmalar, xaridorlar, analitika va yordam yozishmalari — do'kon faol bo'lgan davrda sotuvchi uchun saqlanadi. Sotuvchi yoki biz ularni qonun talab qilgan muddatgacha (masalan, buxgalteriya hisobi uchun) saqlashimiz mumkin.
• Egasi hisobini o'chirgan do'kon darhol bloklanadi: vitrina yopiladi, bot uziladi. 30 kundan keyin shu do'kon xaridorlarining shaxsga doir ma'lumotlari (ism, telefon, manzil va boshqalar) shaxsni aniqlab bo'lmaydigan holga keltiriladi.

Muddat tugagach yoki o'chirish so'rovi bo'yicha ma'lumotlar o'chiriladi yoki shaxsni aniqlab bo'lmaydigan holga keltiriladi. Qonun saqlashni talab qiladigan ma'lumotlar bundan mustasno.

• sayt, panel va API bilan aloqa HTTPS (TLS) orqali shifrlanadi;
• parollar faqat xesh ko'rinishida saqlanadi, integratsiya API kalitlari ham xeshlanadi;
• Telegram bot tokenlari, Telegram to'lov provayderi tokeni, Payme va Click kalitlari, webhook imzo kalitlari hamda sun'iy intellekt API kalitlari bazada shifrlangan holda saqlanadi;
• kirish tokenlari HttpOnly cookie'da saqlanadi, JavaScript ularni o'qiy olmaydi;
• har bir do'kon ma'lumotlari alohida baza sxemasida saqlanadi; xodimlar faqat o'z roliga ruxsat berilgan bo'limlarni ko'radi;
• panelda barcha faol seanslaringizni ko'rishingiz va istalganini tugatishingiz mumkin; muhim administrativ harakatlar jurnalga yoziladi.
• xatolarni kuzatish tizimiga yuboriladigan hisobotlardan shaxsga doir ma'lumotlar avtomatik olib tashlanadi (qarang: «Uchinchi tomon xizmatlari»).

Mahsulot rasmlari va do'kon logotiplari vitrinada ko'rinishi uchun ochiq havola orqali beriladi, shuning uchun ularga shaxsga doir ma'lumotlarni qo'shmang. To'lov cheklari (xaridorlarniki ham, obuna to'lovlariniki ham), qaytarish so'rovlariga ilova qilingan rasmlar va profil rasmlari yopiq omborda saqlanadi va faqat ularni ko'rishga ruxsati bor foydalanuvchiga qisqa muddatli (15 daqiqagacha amal qiladigan) imzolangan havola orqali ochiladi.

Hech bir tizim mutlaq xavfsiz emas. Ma'lumotlar sizib chiqqanini aniqlasak, qonunda belgilangan tartibda sizni va vakolatli organni xabardor qilamiz.

Qonunga muvofiq siz quyidagi huquqlarga egasiz:

• ma'lumotlaringizga ishlov berilayotgani, maqsadi va ular kimga uzatilgani haqida bilish;
• ma'lumotlaringiz nusxasini olish;
• noto'g'ri yoki eskirgan ma'lumotlarni tuzatish;
• ma'lumotlarni o'chirishni yoki ishlov berishni to'xtatishni talab qilish;
• rozilikni qaytarib olish;
• vakolatli davlat organiga yoki sudga shikoyat qilish.

Qanday amalga oshirish mumkin

• Ism, parol va interfeys tilini panel sozlamalarida o'zingiz o'zgartirasiz, faol seanslarni o'sha yerda tugatasiz.
• Mahsulot, buyurtma va xaridorlar ro'yxatini panel orqali Excel/CSV faylga eksport qilishingiz mumkin.
• Ma'lumotlaringiz nusxasini panel sozlamalaridagi «Hisob» bo'limida faylga yuklab olasiz va hisobingizni o'sha yerda o'zingiz o'chirasiz. O'chirish oqibatlari «Saqlash muddatlari» bo'limida keltirilgan. Boshqa so'rovlar uchun @milliybotuz_bot orqali murojaat qiling.

So'rovni bajarishdan oldin shaxsingizni tasdiqlashni so'rashimiz mumkin. So'rovlarga qonunda belgilangan muddatlarda javob beramiz. Xaridorlar o'z ma'lumotlari bo'yicha avval tegishli do'konga murojaat qilishi kerak, biz sotuvchiga bu so'rovni bajarishda yordam beramiz.

Sotuvchi paneli 18 yoshdan katta, to'liq muomala layoqatiga ega shaxslar uchun mo'ljallangan. Biz bolalar haqida ongli ravishda ma'lumot yig'maymiz. Xaridorlarning yoshini platforma tekshirmaydi; do'konlar Telegram qoidalariga va qonunga amal qilishi shart.

Agar bola bizga ota-ona roziligisiz ma'lumot berganini bilsangiz, @milliybotuz_bot orqali xabar bering — ma'lumotlarni o'chiramiz.

Biz Siyosatni yangilab turishimiz mumkin. Joriy tahrir shu sahifada e'lon qilinadi, sanasi yuqorida ko'rsatiladi. Muhim o'zgarishlar haqida email yoki panel orqali oldindan xabar beramiz. O'zgarishlardan keyin platformadan foydalanishni davom ettirish yangi tahrirga rozilikni bildiradi.

Maxfiylik, ma'lumotlaringiz yoki ushbu Siyosat bo'yicha savollar uchun biz bilan bog'laning:

Telegram orqali yordam

@milliybotuz_bot

Sayt

milliybot.uz